एसईईमा उत्कृष्ट नतिजापछि डिभाइन टेम्पल एकेडेमीमा सम्मान तथा बधाई कार्यक्रम

दाङको तुलसीपुर–६ स्थित डिभाइन टेम्पल एकेडेमीले एसईई २०८२ मा सफल विद्यार्थीहरूलाई सम्मान तथा बधाई ज्ञापन गरेको छ । विद्यालयद्वारा आयोजित सम्मान तथा बधाई ज्ञापन कार्यक्रम शनिबार तुलसीपुर स्थित मट्का रेष्ट्रो एण्ड पार्टी प्यालेसमा भव्य रूपमा सम्पन्न भएको हो । एसईई परीक्षामा सहभागी जम्मा ३७ जना विद्यार्थीहरु उत्कृष्ट अङ्कका साथ उत्तीर्ण भएका हुन् । कार्यक्रममा उत्तीर्ण सम्पूर्ण विद्यार्थी तथा उनीहरूका अभिभावकलाई खादा तथा माला ओडाएर सम्मान गरिएको थियो ।

कार्यक्रममा बोल्दै डिभाइन एजुकेसन फाउन्डेसनका सीईओ तथा डिभाइन टेम्पल एकेडेमीका प्रिन्सिपल भोजराज न्यौपानेले विद्यालयले केवल परीक्षाको नतिजालाई मात्र नभई विद्यार्थीको समग्र व्यक्तित्व विकासलाई प्राथमिकतामा राखेर शिक्षण गर्दै आएको बताउनुभयो । उहाँले मेहनत, अनुशासन र शिक्षक–अभिभावकको सहकार्यका कारण विद्यालयले उत्कृष्ट नतिजा हासिल गर्न सफल भएको उल्लेख गर्नुभयो । आगामी दिनमा अझ गुणस्तरीय शिक्षा प्रदान गर्दै विद्यार्थीलाई सक्षम नागरिक बनाउने लक्ष्य रहेको उहाँले बताउनुभयो ।

विद्यालयका भाइस प्रिन्सिपल महेश लामिछानेले विद्यार्थीहरूको सफलता पछाडि शिक्षक, अभिभावक र विद्यालय परिवारको सामूहिक योगदान रहेको उल्लेख गर्नुभयो । उहाँले एसईई उत्तीर्ण विद्यार्थीहरूलाई आगामी शैक्षिक यात्रामा अझ मेहनत र अनुशासित बन्न सुझाव दिँदै उज्ज्वल भविष्यको शुभकामना व्यक्त गर्नुभयो ।

त्यस्तै विद्यालयका एकेडेमिक हेड रिम खड्काले निरन्तर अभ्यास, सकारात्मक सोच र शिक्षकको मार्गदर्शनले राम्रो नतिजा सम्भव भएको उल्लेख गर्नुभयो । विद्यालयका ईसिए कोर्डिनेटर आकाश सिंहले विद्यार्थीहरूले पढाइसँगै अतिरिक्त क्रियाकलापमा समेत उत्कृष्ट प्रतिभा देखाएको उल्लेख गर्नुभयो । त्यस्तै पत्रकार आशिष केसीले विद्यालयले शैक्षिक क्षेत्रसँगै विद्यार्थीको क्षमता विकासमा खेलेको भूमिकाको प्रशंसा गर्दै सफल विद्यार्थीहरूलाई बधाई व्यक्त गर्नुभयो ।

अभिभावकको तर्फबाट बोल्दै सुन्दर चौधरीले विद्यालयले विद्यार्थीहरूलाई अनुशासित र गुणस्तरीय शिक्षा प्रदान गरेको बताउँदै विद्यालय परिवारप्रति धन्यवाद व्यक्त गर्नुभयो । उहाँले विद्यालयले शैक्षिकसँगै नैतिक शिक्षामा समेत जोड दिएको उल्लेख गर्नुभयो ।

कार्यक्रममा सहभागी विद्यार्थीहरूले आफ्ना अभिभावक, शिक्षक तथा विद्यालयप्रति कृतज्ञता व्यक्त गरेका थिए । उनीहरूले आफूहरूको सफलतामा विद्यालयको मार्गदर्शन र अभिभावकको निरन्तर साथ महत्वपूर्ण रहेको बताएका थिए । साथै व्यवस्थापन संकाय अध्ययन गर्न इच्छुक विद्यार्थीहरूले आगामी अध्ययन पनि डिभाइन टेम्पल एकेडेमीमै गर्ने बताएका थिए ।

कार्यक्रमको सञ्चालन विद्यालयका कार्यक्रम संयोजक पूर्ण केसी मुस्कानले गर्नुभएको थियो । कार्यक्रममा विद्यालय व्यवस्थापन समिति, शिक्षक–शिक्षिका, अभिभावक, विद्यार्थी तथा विभिन्न क्षेत्रका व्यक्तित्वहरूको उल्लेखनीय सहभागिता रहेको थियो ।

विद्यालयमा कक्षा ११ र १२ मा व्यवस्थापन संकाय अन्तर्गत होटल म्यानेजमेन्ट, फाइनान्स, अकाउन्ट तथा कम्प्युटर साइन्स विषय अध्यापन गरिँदै आएको विद्यालयले जनाएको छ ।