नेपाली काङ्ग्रेस नेपालको सबैभन्दा पुरानो, लोकतान्त्रिक र परिवर्तनकारी राजनीतिक दल हो। समय–समयमा भएका अधिवेशनहरूले पार्टीको दिशा, नीति र नेतृत्व निर्धारण गर्दै आएका छन्। आज देशको जनसंख्याको ठूलो हिस्सा युवा वर्गले ओगटेको अवस्थामा नेपाली काङ्ग्रेसको १५औँ अधिवेशन अनिवार्य रूपमा युवा–मुखी हुन जरुरी छ।
आजका युवाहरू रोजगारी, शिक्षा, उद्यमशीलता, प्रविधि, सुशासन र सामाजिक न्यायका सवालमा गम्भीर छन्। तर राजनीतिक निर्णय तहमा युवाको सहभागिता अझै पर्याप्त छैन। त्यसैले १५औँ अधिवेशनले युवालाई केवल कार्यकर्ता होइन, नीति निर्माणकर्ता र नेतृत्वकर्ताको रूपमा स्थापित गर्नुपर्छ।
अधिवेशनले पार्टी संरचनामा युवाको समानुपातिक प्रतिनिधित्व सुनिश्चित गर्नुपर्छ। युवालाई जिम्मेवारी दिनु जोखिम होइन, भविष्यमा गरिएको लगानी हो। युवा नेतृत्वले पार्टीमा नयाँ ऊर्जा, नवीन सोच र जनतासँगको विश्वास पुनःस्थापित गर्न सक्छ।
त्यसैगरी विदेश पलायन रोक्ने स्पष्ट नीति, स्वरोजगार तथा उद्यमशीलता प्रवर्द्धन, डिजिटल प्रविधिमा आधारित राजनीति, शिक्षाको गुणस्तर र रोजगारीसँगको प्रत्यक्ष सम्बन्धजस्ता मुद्दा अधिवेशनको केन्द्रमा हुनुपर्छ। यिनै विषयहरूले युवालाई राजनीतिप्रति आकर्षित गर्छन्।
नेपाली काङ्ग्रेसको इतिहास युवाको बलिदान र योगदानले भरिएको छ। अब समय आएको छ—इतिहास सम्झने मात्र होइन, युवाको नेतृत्वमा भविष्य निर्माण गर्ने। त्यसैले नेपाली काङ्ग्रेसको १५औँ अधिवेशन साँचो अर्थमा युवा–मुखी होस्। यही आजको आवश्यकता र युवाको आवाज हो।
नेत्रलाल खनाल
नेपाल विद्यार्थी संघ सचिव, बाँफिकोट गाउँपालिका तथा पार्टी सचिव, वडा नं. ६, बाँफिकोट गाउँपालिका हुनुहुन्छ।
